Turkiyada bortida futbolchi Otabek Shukurov bo‘lgan samolyotni yashin urdi

Turkiyaning «Kayserispor» klubi futbolchilari Turkiya chempionatining 36-turi doirasida «Fenerbahche»ga qarshi o‘yin uchun Istanbulga uchib ketayotgan vaqtda laynerni chaqmoq urdi.

Foto: transfermarkt.world

Ob-havo sharoiti tufayli kechiktirilgan samolyot 11 may kuni soat 17:00 da havoga ko‘tarildi. Samolyot parvozni boshlaganidan ko‘p o‘tmay uni yashin urgan va layner uchuvchilari Erkilet aeroportiga qaytishga qaror qilishdi.

Yo‘lovchilar jabrlanmagan. Jamoa boshqa reysda Istanbulga uchib ketdi. Ushbu samolyot bortida o‘zbekistonlik futbolchi Otabek Shukurov ham bo‘lgan.

12 may kuni «Fenerbahche»ga qarshi maydonga tushgan «Kayserispor» yirik hisobda mag‘lubiyatga uchradi. O‘zbekistonlik yarim himoyachi o‘yinni asosiy tarkibda boshladi va butun uchrashuvni maydonda o‘tkazdi.