O‘zbekistonda Turkiya tajribasi asosida tog‘-adirlarni o‘zlashtirish boshlanadi

Turkiya tajribasi asosida tog‘-adirlarni o‘zlashtirish bo‘yicha “yo‘l xaritasi” ishlab chiqiladi hamda qishloq xo‘jaligini sug‘urtalash tizimi joriy qilinadi.

Foto: Prezident matbuot xizmati

Prezident Shavkat Mirziyoyev huzurida Turkiya va Saudiya Arabistoni bilan iqtisodiy va investitsiyaviy hamkorlik bo‘yicha kelgusi rejalar ko‘rib chiqildi.

Yig‘ilishda savdo-iqtisodiy hamkorlikni yanada rivojlantirish borasida ko‘riladigan chora-tadbirlar yuzasidan axborot berildi.

Turkiya tajribasi asosida tog‘-adirlarni o‘zlashtirish bo‘yicha “yo‘l xaritasi”ni ishlab chiqish hamda qishloq xo‘jaligini sug‘urtalash tizimini joriy qilish, xalqaro standartlarga mos o‘zbek-turk Urug‘chilik test markazini ochish mo‘ljallangan.

Ikki mamlakat o‘rtasidagi imtiyozli savdo bitimi doirasida mahsulotlar ro‘yxatini kengaytirish, to‘qimachilik, charm-poyabzal, elektrotexnika, hunarmandchilik mahsulotlariga tarif va boj stavkalarini kamaytirish, Istanbul shahrida O‘zbekistonning savdo vakolatxonasini ochish rejalashtirilgan.

Prezident Turkiyaning yirik kompaniyalari bilan istiqbolli loyihalar portfelini shakllantirish, hududlararo hamkorlikni rivojlantirish bo‘yicha qo‘shimcha ko‘rsatmalar berdi.