Chasiv Yarning sharqiy qismi kultepaga aylangan, Toretsk zarba ostida. Urush suratlari

Ukrainada urushning 864-kuni o‘tdi. Asosiy ma’lumotlar:

• Krasnodar o‘lkasida dronlar hujumi oqibatida uyali aloqa minorasi hamda neft baza shikastlandi.
• Marin Le Pen o‘z partiyasi saylovlarda g‘alaba qozongan taqdirda, Ukraina fransuz qurollari bilan Rossiya hududiga zarba berishi taqiqlanishini aytdi.
• «VKontakte», RF bosh prokuraturasi talabi bilan, o‘ylab topilgan Z-shoir Gennadiy Rakitinning akkauntini blokladi.
• RF mudofaa vazirligi Donetsk oblastidagi Sokol qishlog‘i egallangani haqida xabar berdi.
• Rossiyalik kurashchilar Parijdagi Olimpiadada ishtirok etishdan bosh tortishdi.
• Tergov urushda halok bo‘lgan general Oleg Tsokov 58-armiyaning sobiq qo‘mondoni Ivan Popovga qarshi qo‘zg‘atilgan ishga aloqadorligini tasdiqladi.

Chasiv Yarda RF qo‘shini tomonidan egallangan Kanal rayoni

4 iyul kuni Ukraina mudofaa vazirligi Donetsk oblastining Chasiv Yar shahri sharqidagi Kanal mikrorayonining vayronalari aks etgan fotosuratlarni namoyish etdi. Shu kuni «Xortitsa» operativ qo‘shinlar guruhi rasmiy vakili Nazar Voloshin Ukraina qurolli kuchlari mazkur hududdan chekinganini ma’lum qildi — mikrorayon to‘liq vayronaga aylangan. Voloshinning so‘zlariga ko‘ra, bu hududni ushlab turishdan «ma’no qolmagan»: «Bu harbiy xizmatchilar hayoti va sog‘ligiga xavf tug‘dirardi». U Rossiya qo‘shini shaharda faol harbiy harakatlarni to‘xtatmayotganini qo‘shimcha qilgan.

Kanal rayoni — Chasiv Yarning Severskiy Donets— Donbass kanali ortidagi sharqiy qismi hisoblanadi. Tepaliklarda joylashgan shaharni rayondan suv to‘sig‘i ajratib turadi. Bu hududda 2024 yil bahoridan buyon jang ketmoqda. G‘arbdagi harbiy tahlilchilar rossiyaliklar bu janglarda katta yo‘qotishlarga uchraganini aytishgan.

Toretsk xavf ostida

So‘nggi kunlarda RF qurolli kuchlari Donetsk oblastida yangi yurish boshlagan. Kutilmagan hujum davomida ular Donetskdan shimolda joylashgan Toretsk shahri atrofidagi hududlarni egallab olgan. Ijtimoiy tarmoqlarda tarqalgan videolardan biriga ko‘ra, Horlivka tomondan yurish qilayotgan rus qo‘shini Ukraina qurolli kuchlari mudofaasiga uch-besh kilometr masofada kirib kelib, Toretskdan shimoli-g‘arbdagi Severne (sobiq Kirovo) va Drujba posyolkalarini o‘z nazoratiga olgan. Yurish Horlivka — Konstantinovka temiryo‘li bo‘ylab amalga oshirilmoqda hamda ikki tomondagi manbalar RF qurolli kuchlari shturmda ukrainlarning tayanch punktlari ostidan qazilgan ko‘p kilometrlik tunneldan foydalanganini aytishmoqda. Amaliyotda qishda Avdiyivkaning janubiy chekkalarida tunnel qazib hujumga o‘tgan Rossiya bo‘linmalari ham ishtirok etgan.

Toretsk atrofidagi boshqa yo‘nalishda ham hujum qilinmoqda. Janubi-sharqda — Yujnoye posyolkasida (sobiq Artemovo) — Rossiya qo‘shini Ukraina mudofaasiga bir necha kilometrga kirib kelgan. Bundan tashqari, shahardan shimoli-g‘arbda joylashgan Nyu York posyolkasiga hujum qilinmoqda. Hozircha bu hududda front chizig‘ining aniq konfiguratsiyasi yuzaga kelmagan.

Donetsk oblasti politsiya boshqarmasi ma’lumotiga ko‘ra, hozirdayoq Toretskdagi uylarning uchdan bir qismi vayron bo‘lgan. Shahar aholisini evakuatsiya qilish ishlari olib borilmoqda. 1 iyul holatiga ko‘ra, evakuatsiyaning dastlabki uch kunida Toretskdan 711 kishi, jumladan 20 nafar bola olib chiqilgandi. Shaharda hamon 5 mingga yaqin kishi qolmoqda, obshinada jami 10 ming atrofida kishi yashagan.

DXRda noma’lum askarlarning qoldiqlari qayta dafn etilishi

DXRdagi Yasinovataya o‘qqa tutilishi

Yasinovataya — Donetsk oblastining 5 iyul kuni navbatdagi marta o‘qqa tutilgan shahri. DXR rahbari Denis Pushilinning so‘zlariga ko‘ra, hujum oqibatida 1946 va 1964 yillarda tug‘ilgan ikki ayol, shuningdek 1960 yilda tug‘ilgan erkak halok bo‘lgan. Rossiya tomonidan tayinlangan rasmiylar zarbada Ukraina qurolli kuchlarini ayblagan.