Pentagon rahbari AQSh harbiylariga hujum qilmaslik haqida ogohlantirdi

Lloyd Ostin Iroqdagi AQSh bazasiga qilingan hujumga izoh berdi.

Foto: Zuma / TASS

Qo‘shma Shtatlar Yaqin Sharqda xizmat qilayotgan harbiy xizmatchilariga amalga oshirilgan hujumlarga toqat qilmaydi.

Bu haqda AQSh mudofaa vaziri Lloyd Ostin Iroqdagi «Ayn al-Asad» bazasiga qilingan hujum natijasida amerikalik armiya askarlarining jarohat olganini izohlar ekan, aytib o‘tdi.

Uning so‘zlariga ko‘ra, hujum ortida Eron tomonidan qo‘llab-quvvatlangan shia jangchilari turibdi. Biroq voqea yuzasidan tergov hali yakunlanmagani uchun u aniq bir guruh nomini aytmadi.

Pentagon rahbarining ta’kidlashicha, Qo‘shma Shtatlar Isroilni himoya qilish uchun Yaqin Sharqdagi harbiy ishtirokini kuchaytirmoqda.

Shu bilan birga, u vaziyat keskinlashuvining pasayishi mintaqadagi barcha mamlakatlarga foyda keltirishini ta’kidladi. Ostinning qo‘shimcha qilishicha, Qo‘shma Shtatlar bu yo‘nalishda faol harakat qilmoqda.