Andijonda yosh qizning umriga zomin bo‘lgan haydovchi 4 yilga ozodlikdan mahrum etildi
22 yoshli yigit Damas mashinasini boshqarib borayotib, tezlik chekloviga amal qilmasdan piyodalar yo‘lagidan o‘tayotgan maktab o‘quvchisini urib yuborib, uning o‘limiga sabab bo‘lgan. YTHda vafot etgan 11 yoshli qizning yaqinlari 11 mlrd so‘m ma’naviy va yana shuncha moddiy zarar talab qilgan. Sud faqat 15 mln so‘m ma’naviy zarar undirishni lozim topgan.
![](https://storage.kun.uz/source/10/BZ9A6cgX3sdeDNUQJERl5IvlvAz23JzS.jpg)
Foto: Kun.uz
Andijon shahrida maktab o‘quvchisining umriga zomin bo‘lgan haydovchi jinoiy jazoga tortildi. Kun.uz o‘rgangan sud hujjatiga ko‘ra, YTH 2024 yil 15 mart kuni sodir bo‘lgan. 2002 yilda tug‘ilgan haydovchi A.J. Damas mashinasini Andijon shahri Mustaqillik mahallasi hududida boshqarib ketayotib, piyodalar yo‘lagidan o‘tayotgan 11 yoshli qizni urib yuborgan. Voyaga yetmagan R.O. ushbu paytda maktabdan qaytayotgan bo‘lgan. YTH oqibatida o‘quvchi ko‘rsatilgan tibbiy yordamga qaramasdan oradan 4 kun o‘tib, shifoxonada vafot etgan.
Hukmda keltirilishicha, haydovchi yo‘l harakati qoidalarini qo‘pol ravishda buzib, 30 km/soat tezlik belgilangan hududda mashinani yuqori tezlikda boshqargan.
Haydovchi sudda aybiga to‘liq iqror bo‘lib, mashinani 50-60 km/soat tezlikda boshqarganini, qiz piyodalar yo‘lagidan yugurgan holda chiqqanligini va masofa juda yaqinligi sababli uni urib yuborganligini ma’lum qilgan. Shuningdek, u jabrlanuvchining dafn marosimlariga oila a’zolari tomonidan moddiy yordam taklif etilganida, marhumaning qonuniy vakili tomonidan rad etilganini, qilmishidan pushaymonligini bildirib, suddan o‘ziga nisbatan qonuniy yengillik berishni so‘ragan.
Qizning qonuniy vakili esa suddan haydovchiga nisbatan 10 yil ozodlikdan mahrum qilish jazosi tayinlashni so‘ragan.
“O‘sha kuni voqeani eshitib, darhol shifoxonaga yetib bordim. Og‘ir jarohat olgan qizim koma holatida yotardi. U 19 mart kunidan 20 mart kuniga o‘tar kechasi vafot etdi.
Farzandimning o‘limi biz uchun qattiq iztirob bo‘ldi: 11 yoshga kirgunga qadar boqib-parvarishlab, tarbiyalab, voyaga yetkazgandik, vafoti qattiq ruhiy azob berdi. Qizimning dafn marosimlariga sudlanuvchining oila a’zolari moddiy yordam berishmoqchi bo‘lishdi, lekin qonuniy tarzda moddiy zarar undirish maqsadida taklifni rad qildik.
Sudlanuvchidan 11 mlrd so‘m moddiy va 11 mlrd so‘m ma’naviy zarar undirilishini, unga nisbatan 10 yil ozodlikdan mahrum qilish jazosi tayinlashni so‘rayman”, degan marhumaning qonuniy vakili.
Sud hukmi bilan A.J. Jinoyat kodesining 266-moddasi 2-qismida (Transport vositalari harakati yoki ulardan foydalanish xavfsizligi qoidalarini buzib odam o‘limiga sabab bo‘lish) nazarda tutilgan jinoyatni sodir qilganlikda aybli deb topilgan. Unga nisbatan 3 yil tranport vositalarini boshqarish huquqidan mahrum qilgan holda 4 yil ozodlikdan mahrum qilish jazosi tayinlangan. A.J.dan jabrlanuvchining qonuniy vakili foydasiga 15 mln so‘m ma’naviy zarar undirish belgilangan.
Avvalroq Farg‘onada 4 piyodaning umriga zomin bo‘lgan haydovchi 9 yilga qamalgandi.
Mavzuga oid
![](https://storage.kun.uz/source/thumbnails/_medium/10/3LXaaBqgQ4P56eDXSdCCZ7wCjro8Z3d2_medium.jpg)
21:01 / 12.09.2024
Toshkent viloyatida ag‘darilgan yuk mashinasi pachaqlanib ketdi
![](https://storage.kun.uz/source/thumbnails/_medium/10/w3z4-FDymc8InATzZocB4byBMyF2LD3r_medium.jpg)
20:05 / 12.09.2024
Hududlarda tadbirkorlar quyosh panellarini o‘rnatishga majburlanmoqda. Vazirlik tomoshabinmi?
![](https://storage.kun.uz/source/thumbnails/_medium/10/pr4BQaf-l6NfjOlkM7BVR7KWBK4pfZSS_medium.jpg)
08:05 / 12.09.2024
Yangi O‘zbekiston ko‘chasida sodir bo‘lgan YTHda 2 kishi jarohatlandi
![](https://storage.kun.uz/source/thumbnails/_medium/10/sMa1BUqFwOmih2dQaffolvURQX11FLtT_medium.jpg)
00:14 / 12.09.2024