BAA O‘zbekistonda DXSh loyihalarida ishtirok etishga qiziqish bildirmoqda

Mazkur safar O‘zbekistonda amalga oshirilayotgan xususiylashtirish jarayonlari va davlat-xususiy sheriklik loyihalariga BAA investorlari jalb etishga qaratilgan "Road shou" tadbirlarini o‘tkazish maqsadida uyushtirildi.

O‘zbekiston tomoni BAAning Al Ghurair investment, RKH investment holdings, AlNowais investmens, MBS Global singari yirik kompaniyalari  va ADQ, ADFD, Mubadala investment company suveren fondlari bilan ikki tomonlama muzokaralar o‘tkazildi.

Uchrashuvlar davomida ustuvor tarmoqlarda davlat-xususiy sheriklik asosida umumiy qiymati 30 milliarddan ortiq bo‘lgan 63 ta loyiha hamda  xususiylashtirish taklif etilgan 21 ta obekt taqdimotlari tashkil etildi.

Ularda O‘zbekistonda investitsiya muhitini yaxshilash, soliq yukini kamaytirish, bojxona to‘lovlarini yengillashtirish va investorlar huquqlarini qonunchilik bilan himoya qilish borasidagi keng ko‘lamli islohotlarning amaliy jihatlari haqida ma’lumot berildi.

Tashrif yakunida O‘zbekistondagi energetika, chiqindini qayta ishlash, ta’lim, kommunal xo‘jalik, ichimlik suvi ta’minoti, sog‘liqni saqlash va aeroportlarni boshqarish borasidagi xususiylashtirish dasturi hamda davlat-xususiy sheriklik loyihalarida ishtirok etishga qiziqish bildirgan BAAning 10 yaqin kompaniyalari bilan muzokaralarni davom ettirishga kelishildi.