DXSh loyihalarini amalga oshirish tartibi tasdiqlandi

Hujjat bilan Davlat-xususiy sheriklik loyihalarini amalga oshirish tartibi to‘g‘risidagi nizom tasdiqlandi. U quyidagi tartiblarni belgilaydi:

• DXSh loyihalarini dastlabki baholash, tashabbus qilish, loyiha hujjatlarini ishlab chiqish, ko‘rib chiqish va kelishish;
• DXSh loyihalarining tanlov hujjatlarini ishlab chiqish va kelishish, davlat-xususiy sheriklik shartnomasini tuzish;
• DXSh loyihalarini amalga oshirishda yer uchastkalari va mulkiy komplekslarni taqdim etish;
• DXSh loyihalari reyestrini yuritish, ularning amalga oshirilishini nazorat qilish va hisobot taqdim etish.

Shuningdek, Davlat-xususiy sheriklik loyihalarini moliyalashtirish tartibi to‘g‘risidagi nizom tasdiqlandi. Unda DXSh loyihalari doirasida obektlarni qurish, rekonstruksiya qilish va modernizatsiyalash, ta’mirlash va saqlash bilan bog‘liq xarajatlarni ta’minlash manbalari ko‘rsatilgan. Nizomda davlat budjetidan subsidiyalar va kreditlar ajratish, kredit liniyalarini ochish, shuningdek, budjet tizimi mablag‘laridan maqsadli foydalanishni ta’minlash tartibi ham belgilangan.

Manfaatdor vazirliklar va idoralar hamda hokimiyatlarga umumiy qiymati 10 mln AQSh dollaridan ortiq bo‘lgan DXSh loyihalarini amalga oshirishda xalqaro Source platformasiga ulanish orqali investitsiyaviy jozibadorlikni oshirish va xalqaro investorlarni jalb qilish bo‘yicha choralar ko‘rish topshirildi. Source'da DXSh loyihasi konsepsiyasi, tender hujjatlari va bitim shartlari to‘g‘risidagi ma’lumotlar joylashtiriladi.