Falastin prezidenti va ADL bosh kotibi Falastin va G‘azodagi vaziyatni muhokama qildi

Uchrashuv Qohirada bo‘lib o‘tdi, u yerda Falastin prezidenti misrlik hamkasbining taklifiga binoan 12-Butunjahon shaharlar forumida ishtirok etish uchun keldi.

Foto: Sean Gallup / Getty Images

Falastin prezidenti Mahmud Abbos Arab davlatlari ligasi Bosh kotibi Ahmad Abu G‘ayt bilan uchrashuv o‘tkazdi, unda Falastin masalasidagi dolzarb o‘zgarishlar hamda G‘azoda o‘t ochishni to‘xtatishga erishish harakatlari muhokama qilindi.

Falastinning WAFA axborot agentligi xabariga ko‘ra, uchrashuv Qohirada bo‘lib o‘tgan, Abbos Misr prezidenti Abdulfattoh as-Sisining taklifiga binoan 12-Butunjahon shaharlar forumida ishtirok etish uchun kelgan.

Abbos Abu G‘aytga Falastin masalasi bilan bog‘liq so‘nggi o‘zgarishlar, Falastin xalqi holati va G‘azodagi mojaroga barham berish uchun davom etayotgan sa’y-harakatlar haqida ma’lumot berdi.

Bundan tashqari, Abbos ADL bosh kotibi bilan Saudiya Arabistoni poytaxti Ar-Riyodda 11 noyabr kuni o‘tkazilishi rejalashtirilgan favqulodda arab-islom sammitidan kutayotgan umidlari bilan o‘rtoqlashdi.