Navoiyda elektromontyor 12 kishining nomiga kredit olib, onlayn qimorga yutqazib qo‘ydi

Uchquduqda odamlar nomiga onlayn kredit olib, qimorga yutqazib qo‘ygan yigit jinoiy jazoga tortildi. Kun.uz sud hujjati bilan tanishdi.

Sud hukmida keltirilishicha, 2002 yilda tug‘ilgan J.A. “Navoiy kon-metallurgiya kombinati” AJ Shimoliy kon boshqarmasiga qarashli 3-sonli GMZda elektromontyor bo‘lib ishlab kelgan. U ishdan bo‘sh vaqtlarida Uchquduq tumani markaziy dehqon bozori hududida joylashgan uyali aloqa vositalari do‘konida sotuv ishlariga ko‘maklashgan.

J.A. do‘konda asosan mijozlarga telefon sotib olish uchun onlayn kredit rasmiylashtirib berish bilan shug‘ullangan. Keyinchalik esa ushbu amaliyot bajarilgan telefondagi ilovada mijozlarning kredit tarixi saqlanib qolganidan foydalanib, ularning nomiga onlayn kredit rasmiylashtirib olgan.

Elektromontyor 2024 yilning iyun oyidan avgust oyiga qadar 12 kishining nomiga kredit chiqargan. Jumladan, u I.U. nomiga 8,5 mln so‘m, J.E. nomiga 13 mln so‘m, A.E. nomiga 17 mln so‘m, T.T. nomiga 2,2 mln so‘m, Sh.T. nomiga 8,6 mln so‘m, S.A. nomiga 9 mln so‘m, K.A. nomiga 13,8 mln so‘m, V.S. nomiga 8,8 mln so‘m, B.B. nomiga 24,8 mln so‘m, F.M. nomiga 15 mln so‘m, H.R. nomiga 13,5 mln so‘m hamda A.U. nomiga 6,5 mln so‘m onlayn kredit rasmiylashtirgan. Shuningdek, fuqaro A.U.ning 9,2 mln so‘mlik oylik ish haqi ham o‘zlashtirib olingan.

J.A. rasmiylashtirilgan kredit mablag‘larini o‘zining foydalanuvidagi ilovada saqlanib qolgan M.E. nomiga rasmiylashtirilgan virtual kartaga 1 mln so‘mdan o‘tkazib borgan. So‘ngra esa virtual kartadagi mablag‘larni onlayn qimorga tikib, yutqazib qo‘ygan.

J.A. sudda aybiga to‘liq iqror bo‘lgan hamda otasi yo‘qligini, onasi bilan birga yashashini, o‘z uyini sotib, jabrlanuvchilarga yetkazilgan zararni qoplaganini bildirgan. U suddan o‘ziga ozodlikdan mahrum qilish bilan bog‘liq bo‘lmagan jazo tayinlashni so‘ragan.

Jinoyat ishlari bo‘yicha Uchquduq tuman sudi hukmi bilan J.A. Jinoyat kodeksining 141-2-moddasi (shaxsga doir ma’lumotlar to‘g‘risidagi qonunchilikni buzish) 2-qismi “b,v” bandlari, 169-moddasi (o‘g‘irlik) 3-qismi “a,b” bandlari va 168-moddasi (firibgarlik) 3-qismi “b,g” bandlarida nazarda tutilgan jinoyatlarni sodir qilganlikda aybli deb topilgan. Unga 4 yil muddatga ozodlikni cheklash jazosi tayinlangan.

Oldinroq Buxoroda o‘nlab shaxslar nomiga kredit olib, onlayn qimorga tikib yuborgan 16 yoshli bola qamoqqa olingani xabar qilingandi.