“Uz-Koram Kompani” MChJdagi davlat ulushi 24 mln dollarga sotildi

“Uz-Koram Kompani” MChJ ustav kapitalidagi 100 foiz davlat aksiyalar paketi 24 mln dollarga “Centrum Aviation FZCO” kompaniyasiga sotildi. Bu haqda Davlat aktivlarini boshqarish agentligi xabar berdi.

Qayd etilishicha, potensial investorlardan “Uz-Koram Kompani” MChJni sotib olish bo‘yicha 5 ta ariza kelib tushgan. Yakunda faqatgina 2 nafar xaridor tomonidan belgilangan muddatda majburiyatga ega bo‘lgan takliflar (BO) taqdim qilingan.

Xususiylashtirish jarayoniga konsultant sifatida “Portfolio Investmens” konsalting kompaniyasi jalb qilingan.

“Davaktiv” xabarida qayd etilishicha, korxonaning asosiy faoliyat turini 10 yildan kam bo‘lmagan muddat davomida saqlab qolish, mahsulotlarning lisenziati bo‘lgan Genaeral Motors kompaniyasi (AQSh) tomonidan tasdiqlangan yetkazib beruvchi bilan texnik qo‘llab-quvvatlash bo‘yicha litsenziya kelishuvlariga va GM texnologiyalari bilan bog‘liq texnologik jihozlardan foydalanish yuzasidan “Bosh alyans” kelishuvida o‘rnatilgan talablar va tegishli cheklovlarga qat’iy rioya qilish kabi shartlar xaridor tomonidan qabul qilingan.

Ma’lumot uchun: “Centrum Aviation FZCO” – Centrum Holding tarkibida tashkil etilgan. Asosiy faoliyati havo yuk tashish va aviatsiya savdosida brokerlik xizmatlarini ko‘rsatish, havo kemalarini ijaraga berishdan iborat. “Centrum Air” brendi ostida O‘zbekistonda avia xizmatlarini ko‘rsatadi.