Bog‘chada bolalarga kobra bilan tomosha ko‘rsatildi

Ijtimoiy tarmoqlarda bolalar bog‘chasida zaharli ilonlar bilan tomosha qo‘yilgani aks etgan videolavha tarqaldi. Bolalar ombudsmani holat yuzasidan munosabat bildirdi.

Ma’lum qilinishicha, maktabgacha ta’lim muassasasida tarbiyalanuvchilarga O‘rta Osiyo kobralari bilan tomosha uyushtirilgan. Bunda bog‘cha ma’muriyati tomonidan bolalarning hayoti va sog‘lig‘i uchun xavfsizlik choralari ta’minlanmagan.

“Hozirda ichki ishlar organlari tomonidan mazkur holat qachon va qayerda sodir bo‘lganini aniqlash choralari ko‘rilmoqda, vaziyatga huquqiy baho berish masalasi hal etiladi”, deyiladi Bolalar ombudsmani munosabatida.

Holat yuzasidan qo‘shimcha ma’lumot berilishi bildirilgan.

Avvalroq Samarqand viloyatining Qo‘shrabot tumanida ham ikki fuqaro tegishli ruxsatnomasiz ta’lim muassasalarida pul evaziga Qizil kitobga kiritilgan bo‘g‘ma ilon tomoshasini o‘tkazgani aniqlangan edi. O‘shanda noqonuniy saqlangan yo‘lbars pitoni hujjatlashtirilib, viloyat Ekologiya boshqarmasiga topshirilgandi.