Jahon | 17:47 / 28.01.2025
4446
3 daqiqa o‘qiladi

Qirg‘izistonda to‘y va dafn marosimlarini tartibga solish taklif etildi

So‘nggi yillarda qirg‘izistonliklar turli bayram va marosimlarga haddan tashqari ko‘p mablag‘ sarflayotgani, bu esa «oila budjetiga jiddiy zarar yetkazayotgani» ta’kidlandi.

Foto: Advantour

Qirg‘izistonda dafn marosimlari, to‘y va boshqa oilaviy tadbirlarda isrofgarchilikka qarshi kurashishni taklif qiluvchi qonun loyihasi jamoatchilik muhokamasiga taqdim etildi, deb xabar berdi Kloop.

Qonun loyihasi bir qator taqiqlarni nazarda tutadi:

- dafn marosimlarida mayda chorva, ot yoki qoramol so‘yish taqiqlanadi;

- marhum dafn etilgach, uch kundan so‘ng bir bosh ot yoki qoramol so‘yish bilan xotira tadbiri o‘tkazilishi mumkin;

- 7 kun, 40 kun va yillik ma’raka o‘tkazish taqiqlanadi;

- to‘yga 250 nafardan ortiq odam chaqirish taqiqlanadi va faqat bir bosh qoramol yoki ot so‘yilishi mumkin;

- kelin uzatish kechasiga 100 nafardan ortiq mehmon kela olmaydi;

- agar to‘y va qiz uzatuvi birga o‘tkazilsa, unda 350 nafardan ortiq odam taklif qilinishi mumkin emas;

- to‘y kortejiga uchtadan ko‘p bo‘lmagan mashina ruxsat etiladi va boshqa cheklovlar.

Ushbu taqiqlar buzilgan taqdirda tadbir egasini 300 ming qirg‘iz so‘mi (≈44,5 mln so‘m), muassasa egasini esa 200 ming qirg‘iz so‘mi (≈29,6 mln so‘m) miqdorida jarima solish taklif qilinmoqda.

Qonun loyihasi tashabbuskori, deputat Zamirbek Mamasodiqov so‘zlariga ko‘ra, so‘nggi yillarda qirg‘izistonliklar turli bayram tadbirlariga haddan tashqari ko‘p mablag‘ sarflamoqda, bu esa «oila budjetiga jiddiy zarar yetkazmoqda». Ko‘pincha oilalar bunday tadbirlarni o‘tkazish uchun kredit olishga majbur bo‘lmoqda, bu esa halokatli oqibatlarga, jumladan, ajralishlarga olib kelyapti.

Qirg‘iziston prezidenti Sadir Japarov 2022 yil fevralda «Jamiyatdagi ma’naviy muhitga salbiy ta’sir ko‘rsatuvchi diniy marosimlar va boshqa tadbirlarni o‘tkazishda isrofgarchilikning oldini olish»ga qaratilgan farmonni imzolagan edi. 2024 yil oxirida esa davlat rahbari qabr toshlarini o‘rnatishga cheklovlar kiritdi.

Mavzuga oid