5,3 mlrd so‘mlik gazdan noqonuniy foydalangan sex aniqlandi

Andijon viloyati Xo‘jaobod tumanida ko‘p miqdordagi tabiiy gazdan noqonuniy foydalangan ohak ishlab chiqarish sexi aniqlandi.

«Hududgazta’minot» xabariga ko‘ra, «Hududgaz Andijon» gaz ta’minoti filiali komplayens nazorat tuzilmalari, tuman gaz ta’minoti bo‘limi, «O‘zenergoinspeksiya» va Bosh prokuratura huzuridagi Iqtisodiy jinoyatlarga qarshi kurashish departamenti xodimlari hamkorligida reyd o‘tkazilgan.

Jarayonda tumanning Besh qovoq mahallasida joylashgan «B. B. B.» MChJga qarashli bino tekshirilgan. Natijada loyiha texnik hujjatlarisiz, nosoz holatdagi gaz hisoblash uskunasi bilan bir dona ohak xumdonida 20 dona nostandart gaz yondirgichlar orqali ohak tayyorlash uchun tabiiy gazdan noqonuniy foydalanib kelinayotgani ma’lum bo‘ldi.

Tabiiy gazdan foydalanish shartnomasida tuz ishlab chiqarish maqsadida foydalanish ko‘rsatilgan bo‘lsa-da, korxona gazdan ohak ishlab chiqarishda foydalangan. Bundan tashqari, gaz hisoblash uskunasi nosozligi sabab MChJ tarmoqdan uzilib, bir martalik tamg‘a o‘rnatilgan, biroq rahbari uni o‘zboshimchalik bilan buzib, tabiiy gazdan foydalanib kelgan.

Holat yuzasidan dalolatnoma tuzilib, tabiiy gaz sarfi qayta hisob-kitob qilindi va 5 milliard 358 million so‘mlik zarar aniqlandi. Barcha hujjatlar huquqni muhofaza qiluvchi organlarga yuborildi.