Prezident Ai-80dan voz kechish va aholini arzon yoqilg‘i bilan ta’minlash topshirig‘ini berdi

Prezident farmoni bilan, mas’ullarga 2025 yil oxiriga qadar Ai-80 benzini sotuvini cheklash uchun “barcha kuch va vositalarni safarbar etish” topshirig‘i berildi. Farmonga ko‘ra, bu jarayonda aholi sifatli, ekologik toza va arzon yonilg‘i bilan ta’minlanishi kerak.

Foto: Kun.uz

Prezident farmoni bilan, 2025 yilgi davlat dasturi tasdiqlandi.

Farmonga ko‘ra, 2025 yil yakuniga qadar quyidagi ikki vazifasi ijrosi uchun barcha kuch va resurslar safarbar etiladi:

aholini sifatli, ekologik toza va arzon yonilg‘i bilan ta’minlagan holda, Ai–80 rusumli avtomobil yonilg‘isidan foydalanish va sotishni cheklash;
respublikaning barcha hududlarida joylashgan issiqlik va elektr energiyasi ishlab chiqarish korxonalariga yonilg‘i sifatida mazutdan foydalanishni to‘liq taqiqlash (avariyaviy yonilg‘i sifatida Ekologiya vazirligini xabardor qilib, Vazirlar Mahkamasi bilan kelishgan holda foydalanish holatlari bundan mustasno).

Eslatib o‘tamiz, 2024 yil 24 sentabr kuni qabul qilingan prezident qarori bilan, Toshkent shahri va unga tutash Toshkent viloyatining hududlarida joylashgan isitish va elektr energiya ishlab chiqarish korxonalarida yonilg‘i sifatida mazutdan foydalanishni 2030 yildan boshlab taqiqlash, Yevro–4 standartidan past yonilg‘ilarni bosqichma-bosqich cheklashni esa 2028 yildan boshlash belgilangan edi.