O‘zbekiston va yana besh davlat natsistlarni ulug‘lashga urinishlarni qoraladi

O‘zbekiston, Belarus, Qozog‘iston, Qirg‘iziston, Rossiya va Tojikiston BMT Inson huquqlari kengashining Jyenevada bo‘lib o‘tgan 58-sessiyasidagi qo‘shma bayonotida insoniyat tarixidagi eng qonli urushga aylangan Ikkinchi jahon urushi tugaganining 80 yilligi arafasida natsistlarni ulug‘lashga urinishlarni qoraladi.

«Biz fashistlar va ularning sheriklarini ulug‘lash istagini mutlaqo qabul qilib bo‘lmaydi deb hisoblaymiz», deyiladi Rossiya delegatsiyasi vakili Yevgeniy Ustinov tomonidan o‘qilgan bayonot matnida. — Ikkinchi jahon urushining boshlanishi va o‘tkazilishi uchun to‘liq javobgarlikni o‘z zimmasiga olgan asosiy natsist jinoyatchilarning harakatlari Nyurnbergdagi Xalqaro harbiy tribunalning hukmi bilan jinoyat deb topilganini eslatib o‘tamiz. Bu fashistlar va ularning sheriklari tomonidan tinch aholini haydab chiqarish va qirib tashlash faktlarini tasdiqlaydi. Bu dahshatli jinoyatlarning barchasi Sovet Ittifoqi xalqlarining genotsidi sifatida baholanishi kerak».

Mamlakatlar, shuningdek, Ikkinchi Jahon urushi boshlanishi uchun Sovet Ittifoqi va fashistlar Germaniyasiga javobgarlikni teng miqdorda yuklashga bo‘lgan har qanday urinishlarni «dunyoni milliy sotsializm dahshatlaridan ozod qilish uchun halok bo‘lgan o‘n millionlab odamlar xotirasiga nisbatan behurmatlik» deb atadi.

«Bizning muqaddas burchimiz natsizm ustidan qozonilgan umumiy G‘alaba haqidagi haqiqatni asrab-avaylash, nafrat mafkurasi, etnik, irqiy yoki diniy asoslar bo‘yicha kamsitish va boshqa g‘ayriinsoniy xatti-harakatlarning qaytalanishining oldini olishdir», deyiladi qo‘shma bayonotda.