Jizzaxda mast holda mashina boshqarib, opa-singilning o‘limiga sababchi bo‘lgan haydovchi uzoq muddatga qamaldi

Jizzax viloyatining Baxmal tumanida ikki nafar qizni urib yuborib, ularning o‘limiga sababchi bo‘lgan haydovchiga sud hukmi o‘qildi. Bu haqda «O‘zbekiston 24» telekanalida xabar berildi. 

YTH 2024 yilning 18 noyabr kuni soat 19:30 atrofida G‘allaorol-Baxmal-Supa-Zomin yo‘lida sodir bo‘lgan. 33 yoshli A.O. Cobalt mashinasini boshqarib kelayotib yo‘lning belgilangan joyidan kesib o‘tayotgan piyodalar — 13 yoshli I.M. va 4 yoshli I.K.ni urib yuborgan. So‘ngra hodisa joyidan yashiringan. YTH oqibatida opa-singil voqea joyida vafot etgan.

Haydovchi sudda aybiga to‘liq iqrorlik bildirib, qilmishidan pushaymonligini aytgan. Sud hukmi bilan haydovchiga 3 yil mashina boshqarish huquqidan mahrum qilgan holda 9,5 yil muddatga ozodlikdan mahrum qilish jazosi tayinlangan. Shuningdek, yetkazilgan moddiy va ma’naviy zarar uchun erkakdan 145 mln so‘m undirilishi belgilangan. 

Kun.uz surishtiruvida mazkur YTH guvohlari haydovchi mast holda boshqa bir avtomobil bilan poyga o‘ynaganini, hodisa vaqtida uning tezligi soatiga 130 km chamasida bo‘lganini aytishgandi. 

Piyodalar yo‘lagidan o‘tayotgan qizlarning yonida yana bir bola bo‘lgan. U mashina yuqori tezlikda kelayotganini payqab, oldinga harakatlangan holda Cobalt urib ketishidan omon qolgan. 

“Tog‘amning bolalari edi. Bular oilada uch farzand, eng kichigi qizaloq. Do‘konga bordik. Men ichkariga kirmay, tashqarida qoldim, qaytayotganda esa ularga yetolmay qoldim. Ikki singlim bilan ukam yo‘lning o‘rtasiga o‘tib ketishdi. Ukam mashinani ko‘rib qolib, qochishga ulgurgan.

Mashina o‘ta yuqori tezlikda kelayotgandi. Ko‘zimni ochib-yumgunimcha singillarimni mashina urib ketdi. Katta singlim ariqqa tushdi, kichigi do‘kon tomonga uchib ketdi. Katta singlimni ariq ichidan chiqarib olishga harakat qildim, kuchim yetmadi. Keyin kichkinasining oldiga bordim, u hali nafas olayotgandi”, degandi marhumalarning qarindoshi.

Qizaloqlarning otasi ham 2020 yilda shu kabi YTHda vafot etgan bo‘lgan.