Odiljon Abduqahhorov «O‘zbekkonsert» rahbarligiga qaytdi

Odiljon Abduqahhorov «O‘zbekkonsert» davlat muassasasi direktori etib tayinlandi. Bu haqda Madaniyat vazirligi matbuot xizmati xabar berdi.

Tayinlov haqida rasman xabar berilmagan, bu haqda madaniyat vaziri Ozodbek Nazarbekovning ijro intizomiga oid o‘tkazgan yig‘ilishi haqidagi press-relizdan ma’lum bo‘lgan.

Abduqahhorov 2017–2020 yillarda ham «O‘zbekkonsert»ga rahbarlik qilgan. Hozirga qadar Madaniyat vazirligi huzuridagi xalqaro festivallar direksiyasi rahbari edi. Endi uning o‘rniga aktyor Fotih Jalolov tayinlangan.

Abduqahhorov rahbarlikdan ketganidan keyingi to‘rt yarim yil ichida «O‘zbekkonsert»da bir necha bor rahbar o‘zgardi. 2020 yil yozida uning o‘rniga Alisher Jamoliddinov vaqtincha rahbar bo‘lgandi, o‘sha yil noyabrida Anvarjon Tojiboyev «O‘zbekkonsert» davlat muassasasi direktori vazifasini vaqtincha bajaruvchi etib tayinlangan. 2021 yil mayida  Jamoliddin Uzoqov tashkilotning yangi rahbariga aylanadi. Bir yil o‘tib, 2022 yil mayida Davron Sheraliyev mazkur davlat muassasasi direktori lavozimiga tayinlandi. 2023 yil oktyabrida esa Sanjar Erdanov «O‘zbekkonsert» direktori vazifasini vaqtincha bajaruvchi etib tayinlangandi. U qachon va nega ishdan olingani ma’lum emas.