Farg‘onada inson ruhiyatiga kuchli ta’sir qiluvchi vositalarni sotayotgan shaxs ushlandi

Farg‘ona viloyati Marg‘ilon shahrida inson ruhiyatiga kuchli ta’sir qiluvchi vositalarni sotayotgan shaxs ushlangan. Bu haqda Bosh prokuratura huzuridagi departament xabar bermoqda.

Ma’lum qilinishicha, departamentning Marg‘ilon shahri bo‘limi va boshqa huquqni muhofaza qiluvchi organ xodimlari hamkorligida o‘tkazilgan tezkor tadbirda fuqaro M.I. tarkibida kuchli ta’sir qiluvchi moddasi mavjud bo‘lgan jami 1 800 quti “Keta collagen coffee mix” mahsulotini fuqaro M.X.ga 21 mln so‘mga sotgan vaqtida ashyoviy dalillar bilan ushlangan.

Qayd etilishicha, mazkur holat yuzasidan Jinoyat kodeksining 251-1-moddasi (giyohvandlik vositalari, ularning analoglari yoki psixotrop moddalar hisoblanmaydigan kuchli ta’sir qiluvchi moddalarni targ‘ib qiluvchi mahsulotni tayyorlash, tarqatish, reklama qilish, namoyish etish yoki bunday moddalarni yoxud zaharli moddalarni qonunga xilof ravishda muomalaga kiritish) bilan jinoyat ishi qo‘zg‘atilib, tergov harakatlari o‘tkazilmoqda.