O‘zbekiston yana netto gaz eksportchisiga aylandi

2025 yilning yanvar-fevral oylarida O‘zbekiston 42 mln dollarlik gaz eksport qildi. Bu o‘tgan yilning mos davridagi ko‘rsatkichga (26,7 mln dollar) nisbatan 57,3 foizga ko‘p. Bu haqda Statistika qo‘mitasi hisobotida keltirilgan.

Birgina fevral oyida 20,2 mln dollarlik gaz sotilgan bo‘lib, bu o‘tgan yilning fevraliga nisbatan 14,5 mln dollarga yoki 3,54 barobarga ko‘p.

O‘z navbatida, mazkur davrda gaz importi 35,8 mln dollarni tashkil etgan. Xususan, fevral oyida gaz sotib olish 8 mln dollargacha (16,4 barobar) qisqargan. Yil boshidan beri gaz importi 6 barobarga (166,7 mln dollardan 35,8 mln dollarga) kamaygan.

Ma’lumot uchun, fevral oyida O‘zbekistonda gaz qazib olish 208,8 mln kub metrga kamayib, 3 mlrd 501,5 mln kub metrgacha qisqargan. Yil boshidan beri umumqisqarish 4,2 foiz bo‘lgan.

Eslatib o‘tamiz, O‘zbekiston 2024 yil davomida Rossiya va Turkmanistondan 1,7 mlrd dollarlik gaz sotib oldi. Bu – 2023 yilga nisbatan 2,4 barobarga, 2022 yilga nisbatan 6 barobarga ko‘p. O‘z navbatida, gaz eksporti qiymat jihatdan 18 foizga oshib, 628 mln dollarga yetdi. Tabiiy gaz qancha narxda import va eksport qilinayotgani “tijoriy sir” sifatida ochiqlanmay keladi.

Bundan besh yil oldin, rasmiylar 2025 yil 1 yanvardan O‘zbekiston tabiiy gaz eksportini to‘xtatishi mumkinligini aytgandi.