Piskentdagi koloniyada asossiz intizomiy bo‘linmaga kiritib qo‘yilgan mahkum Ombudsmanga shikoyat qildi. Uning tanasida lat yeyish alomatlari aniqlangan

Toshkent viloyatida joylashgan 50-son manzil koloniyada jazo muddatini o‘tayotgan mahkum T.I. koloniya xodimlari tomonidan qiynoqqa solinib, so‘ng asossiz ravishda intizomiy bo‘linmaga joylashtirilgani haqida Ombudsmanga murojaat qilgan. Bu haqda Oliy Majlisning Inson huquqlari bo‘yicha vakili – ombudsman axborot xizmati Kun.uz'ga ma’lum qildi.

Ma’lum bo‘lishicha, mahkum T.I. koloniyadagi intizomiy bo‘linmaga 2025 yil 27 fevral kuni joylashtirilgan va unga 10 sutkaga intizomiy bo‘linmaga kiritib qo‘yish haqida qaror qabul qilingan. Ushbu qaror Toshkent maxsus prokurori tomonidan o‘rganilib, bekor qilingan hamda koloniya ma’muriyatining harakatlari Jinoyat-ijroiya kodeksining 105-moddasi (mahkumlarni intizomiy jazolash shartlari) va 111-moddasi (qo‘pol tartibbuzarlik tushunchasi) talablariga zid deb topilgan.

Shuningdek, holat Ombudsman xodimlari tomonidan joyiga chiqib o‘rganilganda, mahkum T.I Piskent tumani markaziy shifoxonasiga joylashtirilgan hamda shifokorlar xulosasiga ko‘ra, uning bosh va ko‘krak qismida lat yeyish alomatlari aniqlangan.

Mahkum olti kun davomida asossiz ravishda intizomiy bo‘linmada saqlanib, uning huquqlari va erkinliklari buzilgan. Shu sababli, Ombudsman tomonidan qonun talablari buzilishiga yo‘l qo‘ygan xodimlarga chora ko‘rilishini so‘rab, Bosh prokuraturaga nazorat xati kiritildi.

Eslatib o‘tamiz, joriy yilning o‘zida Toshkent viloyatidagi qamoqxonalarda saqlanayotgan 2 nafar mahkum vafot etdi.

Xususan, 14 fevral kuni Olmaliqdagi jazoni ijro etish muassasasida 21 yoshli yigit «miokard infarkti»dan vafot etgani ma’lum qilindi. Marhumning onasi va huquq faollari uning tanasida qiynoq izlari borligini aytib, rasmiy versiyaga ishonmagan.

Oradan bir necha kun o‘tib, 16 fevral kuni esa Tovoqsoydagi qamoqxonada boshqa bir mahkum devor bosib qolgani ortidan shifoxonada vafot etdi. Ombudsman va Toshkent maxsus prokuraturasi holatlarni o‘rganmoqda.

Holat bo‘yicha «mehnatni muhofaza qilish qoidalarini buzish» moddasi bilan jinoyat ishi qo‘zg‘atilgan. Tergovni Toshkent maxsus prokuraturasi olib bormoqda.