Varshava universitetida o‘zbek tilini o‘qitish tizimi joriy etiladi

O‘zbekiston elchixonasi tashabbusi bilan Varshava universitetida Samarqand shahrida o‘tkaziladigan YuNeSKO Bosh konferensiyasining 43-sessiyasiga bag‘ishlangan targ‘ibot tadbiri tashkil etildi.

Uchrashuv davomida, shuningdek, O‘zbekiston va Polsha o‘rtasidagi ta’lim va madaniyat sohalaridagi hamkorlik istiqbollari muhokama qilindi. Akademik aloqalarni kengaytirish, talabalar va professor-o‘qituvchilar almashinuvini yo‘lga qo‘yish, ilmiy markazlar o‘rtasidagi hamkorlik imkoniyatlari xususida fikr almashildi.

Varshava universiteti Sharqshunoslik fakulteti vakillari O‘zbekiston tomoni bilan o‘zaro tashriflarni tashkil etishga qiziqish bildirdi. Polsha vakillari, shuningdek, o‘zbek tilini o‘qitishni universitet ta’lim tizimiga joriy etish taklifini ilgari surdi.

Muzokaralar yakunida shu yilning 23-24 aprel kunlari Polshada bo‘lib o‘tadigan O‘zbekiston-Polsha rektorlari forumi doirasida Toshkent davlat sharqshunoslik universiteti bilan anglashuv memorandumini imzolash, o‘zbek tilini ta’lim tizimiga joriy etish va bu jarayonda malakali o‘zbek tili o‘qituvchilarini jalb qilish hamda Erasmus+ dasturi doirasida qo‘shma loyihalarni amalga oshirish bo‘yicha muzokaralarni davom ettirish to‘g‘risida kelishib olindi.