BAAda sohilga neft sizib chiqdi: turistlar o‘zlarini yomon his qilmoqda

Birlashgan Arab Amirliklarining Fujayra shahrida neft mahsulotlari dengizga to‘kilishi oqibatida, mazut bir nechta mehmonxona plyajlarning sohillarigacha sizib chiqqan va qo‘lansa hid hatto dengizdan 5 km uzoqda ham sezilmoqda.

Voqea ro‘y berganiga 4 kun bo‘lgan. Plyajlar 11 apreldan beri tozalanmoqda, biroq hamon vaziyat ancha og‘irligicha qolmoqda — so‘nggi kunlarda dengiz sohilida yangi mazut chiqindilari qayd etilgan. Dengiz ayrim joylarda qora tusga kirgan, qumda esa katta-katta mazut dog‘lari qolmoqda.

Mash Telegram kanalining BAAda dam olayotgan rossiyalik turistlarga asoslanib yozishicha, mehmonxonalar yaqinida dengizda cho‘milish va sohilda sayr qilish imkonsiz darajaga kelib qolgan. «Odatda odam gavjum bo‘ladigan plyajlar bo‘m-bo‘sh — issiq havoda mazutning achqimtir va yoqimsiz hidi muallaq turibdi», degan turistlar.

Ma’lumotlarga ko‘ra, dengizni tozalash uchun kamida yana bir necha kun talab etiladi. Hozircha sohilga yaqinlashgan turistlar nafaqat ko‘ngildagidek dam ololmayotganidan, balki sog‘lig‘iga xavf soluvchi alomatlardan ham aziyat chekishmoqda: o‘nlab turistlar qayt qilish, bosh og‘rig‘i va og‘izda achchiq ta’mdan shikoyat qilgan.

Ekologik falokat hududida kamida to‘rtta mehmonxona bor: Novotel Fujairah, Ibis Fujairah, Al Bahar va Palace Beach Resort Fujairah. Mehmonxonalar ma’muriyati bu holni «tabiiy hodisa» deb baholamoqda va mehmonlarga yordam berishni rad etmoqda — ularga na kompensatsiya to‘langan, na tibbiy ko‘rikdan o‘tishda yordam qilingan. Turistlar o‘z hisobidan boshqa apartamentlarga ko‘chib o‘tmoqda.

Xabar qilinishicha, plyajlar ikki haftaga yopilgan. Mazut chiqindilarini hamon tozalashga ulgurishmayapti — dengizga yaqin joylarga yana yangi neft quyqalari oqib kelmoqda.