To‘rtko‘l tumaniga yangi hokim tayinlandi

Ilhomboy Xudaybergenov To‘rtko‘l tumani hokimi lavozimiga tayinlandi. U 2020 yil mayidan buyon tumanga hokimlik qilib kelgan Rustam Shamuratov o‘rnini egalladi.

Foto: Qoraqalpog‘iston Respublikasi Jo‘qorg‘i Kengesi

Qoraqalpog‘iston Respublikasi To‘rtko‘l tumani hokimi almashdi. Bugun tumanda mahalliy kengashning navbatdan tashqari sessiyasi o‘tkazildi.

Sessiyada Qoraqalpog‘iston Respublikasi Jo‘qorg‘i Kengesining raisi Amanbay Orinbayev ishtirok etgan. Sessiyada Xudaybergenov Ilhomboy Tilavbayevich To‘rtko‘l tumani hokimi etib tayinlangan.

Ma’lum qilinishicha, Ilhomboy Xudaybergenov mehnat faoliyati davomida ichki ishlar organlarida, shuningdek, Toshkent viloyati hokimining o‘rinbosari kabi mas’uliyatli lavozimlarda samarali faoliyat olib borgan.

To‘rtko‘l tumaniga 2020 yil mayidan buyon Rustam Shamuratov hokimlik qilib kelayotgandi. Uning lavozimdan olinish sababi ma’lum qilinmagan.