Toshkent viloyatida ko‘p miqdordagi narkotik bilan bog‘liq jinoyat fosh etildi

Toshkent viloyati IIBB va uning quyi tizimlari tomonidan giyohvandlik vositalari va psixotrop moddalarining noqonuniy aylanishiga qarshi, jumladan ularni saqlash, iste’mol qilish, yetishtirish hamda o‘tkazish holatlarini aniqlash va bartaraf etish bo‘yicha tizimli va uzluksiz chora-tadbirlar olib borilmoqda.

Respublika bo‘yicha o‘tkazilayotgan «Qoradori – 2025» keng ko‘lamli tadbiri doirasida Toshkent viloyati IIBB tezkor xodimlari tomonidan Bekobod shahar IIB hamda DXX viloyat boshqarmasi xodimlari bilan hamkorlikda navbatdagi tezkor tadbir amalga oshirildi.

Tadbir davomida Bekobod shahrida yashovchi shaxs qo‘shni davlatdan kontrabanda yo‘li bilan olib kelingan, qariyb 1 kg bo‘lgan «gashish» giyohvandlik moddasini shaharning Navro‘z mahallasi hududida yashirib qo‘yilgan joyidan olayotgan vaqtida ashyoviy dalil bilan qo‘lga olindi.

Olib borilgan tergovga qadar tekshiruv davomida ushbu giyohvandlik moddasi tojikistonlik narkokurer tomonidan kontrabanda yo‘li bilan yetkazib berilgani aniqlangan.

Mazkur holat yuzasidan ushlangan shaxsga nisbatan Jinoyat kodeksining 273-moddasi 5-qismi bilan jinoyat ishi qo‘zg‘atildi. Tergov harakatlari olib borilmoqda.