Eron ballistik raketalar uchun Xitoydan «ming tonna material» buyurtma qildi

Eron ballistik raketalar ishlab chiqarish uchun Xitoydan katta miqdorda kimyoviy birikma va tarkibiy qismlar buyurtma qildi. Bu haqda The Wall Street Journal o‘z manbalariga tayanib xabar berdi.

Qayd etilishicha, umumiy og‘irligi «ming tonnaga» yetadigan materiallar Eronga yaqin oylar ichida yetib keladi.

Buyurtma qilingan materiallar orasida ammoniy perxlorat ham bor bo‘lib, undan qattiq raketa yoqilg‘isi va portlovchi moddalarda oksidlovchi sifatida foydalaniladi. WSJ ma’lumotlariga ko‘ra, buncha hajmdagi buyurtmadan bir necha yuz ballistik raketa uchun yoqilg‘i sifatida foydalanish mumkin.

Oldinroq Xitoyda Eronga tegishli ikkita kemaga 1 ming tonnadan ortiq kuchli oksidlovchi bo‘lgan natriy perxlorat yuklangani ma’lum bo‘lgandi. Ushbu yuk joriy yil fevral-martlarda Eronda yetkazilgan. Ta’kidlanishicha, buncha miqdordagi natriy perxlorat yaqin masofaga mo‘ljallangan taxminan 260 ta ballistik raketaga yetadi.