Braziliyada 17 yoshli qiz noma’lum muxlisi yuborgan shirinlikni yeb vafot etdi

Braziliyada 17 yoshli Ana Luiza de Oliveyra Neves ismli qiz anonim muxlisi yuborgan shirinlikdan zaharlanib vafot etdi, deb xabar beradi CNN Brasil.

Qayd etilishicha, kurer tomonidan qizga yetkazib bergan desert qog‘ozida quyidagicha yozuv bo‘lgan: «Men shu vaqtgacha uchratgan eng chiroyli qiz uchun shirinlik». Sovg‘ani kim yuborgani ko‘rsatilmagan. Ana Luiza shirinlik bilan suratga tushgan va uni ijtimoiy tarmoqlarga joylashtirgan, keyin esa uni yegan.

Oradan bir soat o‘tgach, qizning ahvoli og‘irlashgan. Otasi uni shifoxonaga olib borgan. Shifokorlar zaharlanish tashxisini qo‘ygan, qator muolajalarni bajarib, Ana Luizani uyiga jo‘natib yuborgan. Ertasi kuni jabrlanuvchining ahvoli yomonlashgan — u hushini yo‘qotgan. Shifoxonaga olib ketilayotganida esa qiz vafot etgan. 3 iyun kuni Ana Luiza dafn etilgan.

Shifokorlarning taxminicha, zaharlanish shirinlik sabab kelib chiqqan. Politsiya tergovi davomida shirinlikni noma’lum muxlis emas, qurbonning yaqin dugonasi yuborgani aniqlangan. Gumonlanuvchi Ana Luizaning go‘zalligiga hasad qilgani bois shirinlikka margimush qo‘shganini tan olgan.

Ushbu qiz oldin ham jinoyatga qo‘l urgan: u ikki yigitini yo‘ldan urgan tanishi bilan ham xuddi shunday yo‘l tutgan. Birinchi qurbon omon qolishga muvaffaq bo‘lgan. Hozirda gumonlanuvchi voyaga yetmaganlar uchun mo‘ljallangan axloq tuzatish muassasasida.