Xorazmda qishloq xo‘jaligi bo‘limi mas’ul xodimiga jinoyat ishi qo‘zg‘atildi

DXX xabariga ko‘ra, Xorazm viloyati Yangiariq tumani qishloq xo‘jaligi bo‘limining mas’ul xodimi tuman hududida joylashgan va “Xorazm davlat o‘rmon xo‘jaligi” davlat muassasasi balansida bo‘lgan 29 gektar yer maydonini chorvachilik yo‘nalishida 49 yil muddatga ijara asosida foydalanish uchun olib berish va mansabdor tanishlari orqali kadastr hujjatlarini rasmiylashtirib berish evaziga fuqarodan 4000 AQSh dollari talab qiladi.

Davlat xavfsizlik xizmati hamda Iqtisodiy jinoyatlarga qarshi kurashish departamenti hamkorligida o‘tkazilgan tezkor tadbirda mazkur shaxs 3900 AQSh dollari va 1 297 000 so‘m pul mablag‘ini olgan vaqtida ashyoviy dalillar bilan ushlandi.

Unga nisbatan Jinoyat kodeksining 168-moddasi 2-qismi “a” bandi va 28,211-moddasi 1-qismi bilan jinoyat ishi qo‘zg‘atilib, tergov harakatlari olib borilmoqda.