Arab davlatlari isroillik vazirning G‘arbiy sohil anneksiyasi haqidagi chaqirig‘ini qoraladi

Arab davlatlari Isroilni bosib olingan G‘arbiy sohilni anneksiya qilishga chaqirayotgani uchun keskin tanqid qilib, bunday harakatlar xalqaro huquqning to‘g‘ridan to‘g‘ri buzilishi va tinchlikni yanada qiyinlashtiradigan xavfli qadam ekanini ta’kidladi.

Falastinning WAFA axborot agentligiga ko‘ra, Falastin ma’muriyati matbuot kotibi Nabil Abu Rudeyna bunday chaqiriqlarni rad etib, «mintaqa vulqon otilishi yoqasida turgani» haqida ogohlantirgan. Uning ta’kidlashicha, isroillik siyosatchilarning bayonotlari xalqaro qarorlar va qonunlarga zid keladi va Isroilning Falastin masalasini yo‘q qilish rejalarini amalga oshirishga bo‘lgan qat’iy urinishlarining bir qismidir.

Saudiya Arabistoni ham Isroil adliya vaziri Yariv Levinning bayonotlarini qoralab, u xalqaro qarorlarga zid ekanini ta’kidladi. Podshohlik bayonotida Falastin hududidagi yahudiy aholi punktlarini kengaytirishga qaratilgan har qanday urinishlarni rad etish, shuningdek, Isroilga xalqaro qonunlarga rioya qilish uchun bosim o‘tkazish kerakligi aytilgan.

Qatar Tashqi ishlar vazirligi Levinning «anneksiya zarurati» haqidagi bayonotlarini Isroilning «o‘troqchilik, mustamlakachilik va irqchilik siyosati»ning ko‘rinishi deb atadi. Qatar bu xalqaro huquqning ochiqdan ochiq buzilishi ekanligini ta’kidlab, xalqaro hamjamiyatni Isroilning xavfli qadamlariga, jumladan, Quddusni yahudiylashtirish rejalariga qarshi kurashish uchun zudlik bilan sa’y-harakatlarni birlashtirishga chaqirdi.

Kuvayt, shuningdek, Isroil rasmiylarining okkupatsiya G‘arbiy sohilni ham qamrab olishi haqidagi chaqiriqlarini keskin qoraladi. Kuvayt Tashqi ishlar vazirligi BMT Xavfsizlik kengashini xalqaro qonuniylikni himoya qilish hamda mintaqada tinchlik va xavfsizlikni ta’minlash mas’uliyatini o‘z zimmasiga olishga chaqirdi.