Xorijiy fuqarolarni texnikumlarga o‘qishga qabul qilish jarayoni soddalashtiriladi

Hukumatning ayrim qarorlariga quyidagilarni nazarda tutuvchi o‘zgartirish va qo‘shimchalar kiritiladi:

• kasbiy ta’lim tashkilotlariga chet el fuqarolari va xorijda yashovchi fuqaroligi bo‘lmagan shaxslarni o‘qishga qabul qilish tartibini soddalashtirish;
• chet el fuqarolari va xorijda yashovchi fuqaroligi bo‘lmagan shaxslarning o‘qishini xorijiy kasbiy ta’lim tashkilotlaridan O‘zbekiston kasbiy ta’lim tashkilotlariga ko‘chirish;
• kasbiy ta’lim tashkilotlarda tahsil olayotgan chet el fuqarolari va xorijda yashovchi fuqaroligi bo‘lmagan shaxslarning o‘qishini ko‘chirish.

Chet el fuqarolari va xorijda yashovchi fuqaroligi bo‘lmagan shaxslarning (xorijiy fuqarolar) o‘qishini xorijiy kasbiy ta’lim tashkilotlaridan O‘zbekistondagi kasbiy ta’lim tashkilotlariga ko‘chirish Oliy ta’lim, fan va innovatsiyalar vazirligi tomonidan amalga oshiriladi.

O‘zbekistondagi kasbiy ta’lim tashkilotlarida tahsil olayotgan chet el fuqarolari va xorijda yashovchi fuqaroligi bo‘lmagan shaxslarning o‘qishini ko‘chirish kasbiy ta’lim tashkilotlarida tahsil olayotgan o‘quvchilarni o‘qishini ko‘chirish tartibi asosida amalga oshiriladi.

Xorijiy ta’lim tashkilotlaridan o‘qishni ko‘chirishni istagan xorijiy fuqarolar Oliy ta’lim, fan va innovatsiyalar vazirligiga o‘qishni ko‘chirishni istayotgan kasbiy ta’lim tashkilotini ko‘rsatgan holdagi ariza, pasport ma’lumotlari va o‘qigan ta’lim tashkilotidan berilgan ma’lumotnoma (baholar qaydnomasi)ni topshiradi.

Xorijiy fuqarolarning o‘qishini xorijiy kasbiy ta’lim muassasalaridan O‘zbekiston kasbiy ta’lim tashkilotlariga o‘qishni ko‘chirish bo‘yicha arizalarni taqdim etish har yili 15 iyuldan 15 avgustga qadar amalga oshiriladi.

Xorijiy davlat diplomatik vakolatxonalari, konsullik muassasalarining, xalqaro tashkilotlari xodimlari va xorijiy ekspertlarning farzandlari yoki ular tomonidan vasiylikka olingan voyaga yetmagan shaxslar o‘quv yili davomida O‘zbekiston kasbiy ta’lim tashkilotlariga o‘qishini ko‘chirish bo‘yicha arizani Oliy ta’lim, fan va innovatsiyalar vazirligiga topshirishlari mumkin.

O‘qishini ko‘chirish istagini bildirgan xorijiy fuqaro quyidagi hujjatlarni Oliy ta’lim, fan va innovatsiyalar vazirligiga taqdim etadi:

• ariza (arizada o‘qigan kasbiy ta’lim muassasasi va ta’lim yo‘nalishi (mutaxassisligi), ta’lim shakli ko‘rsatiladi);
• milliy pasport (amaldagi vizasi bilan) yoki tug‘ilganlik haqidagi guvohnoma;
• o‘qigan ta’lim tashkilotidan berilgan ma’lumotnoma (baholar qaydnomasi).