Surxondaryoda Nexia maktab oldidagi piyodalar yo‘lagida 8 yoshli qizaloqni urib o‘ldirdi

Jinoyat ishlari bo‘yicha Uzun tumani sudida sakkiz yoshli maktab o‘quvchisini urib o‘ldirgan shaxsga hukm o‘qildi. Bu haqda Hudud axborot dasturida xabar berilgan.

Ma’lum bo‘lishicha, Nexia-2 rusumli avtomobilni boshqargan 29 yoshli haydovchi yaqin atrofda maktab borligi haqida ogohlantiruvchi yo‘l belgisi borligiga qaramay, tezlikni pasaytirmagan. U maktab oldidagi piyodalar yo‘lagi bo‘ylab o‘tayotgan qizaloqni urib yuborgan.

Marhumning onasi sudda «bu kabi yo‘l-transport hodisalarining oldini olish va norasida go‘daklar avtohalokat qurboniga aylanib qolmasligi hamda boshqalarga ham dars bo‘lishi» uchun ayblanuvchiga og‘irroq jazo tayinlanishini so‘ragan.

Sud hukmiga ko‘ra, haydovchi ikki yil muddatga barcha turdagi transport vositalarini boshqarish huquqidan mahrum etilib, 5 yil muddatga ozodlikdan mahrum etilgan.