Toshkent viloyatida quriladigan aeroport qanday bo‘ladi?

Yangi quriladigan aeroport hozirgi aeroportdan 17 km uzoqlikda – Toshkent shahridan janubda joylashadi. Bu haqda «O‘zbekiston 24» kanaliga bergan intervyusida transport vaziri Ilhom Mahkamov ma’lum qildi.

Loyiha davlat-xususiy sheriklik asosida amalga oshiriladi. Yangi aeroport Samarqand bilan bog‘lovchi amaldagi avtomobil yo‘li va yaqin kelajakda quriladigan pulli trassaga yaqin joyda bo‘lishi rejalashtirilgan.

Uzbekistan Airports kompaniyasi rahbari Javlonbek Umarxo‘jayevning ta’kidlashicha, poytaxtning mavjud aeroporti yiliga 11 mln yo‘lovchiga xizmat ko‘rsatish imkoniyatiga ega.

«Hozirgi kundagi iqtisodiy o‘sish, turistlar oqimining ko‘payishi va xalqaro ishbilarmonlik aloqalarining kengayishi hisobiga hozirgi Toshkent xalqaro aeroporti o‘sib borayotgan yukni ko‘tara olmayapti. Kunning tig‘iz paytlarida tirbandliklar, avtoturargohlarga mashinalarning sig‘masligi kuzatilyapti», — dedi u.

Uzbekistan Airports rahbarining qo‘shimcha qilishicha, 2030 yildan so‘ng yo‘lovchilar soni 15 mln nafardan oshishi kutilyapti. Biroq bir vaqtning o‘zida bir nechta uchish-qo‘nish yo‘lagidan foydalanish imkonsiz.

«Yana bir muhim jihatlardan biri bu – havo hududi. Mavjud aeroport shahar markaziga yaqin joylashgani hisobiga uchish trayektoriyasida manyovr qilish masalasi 50 foizgacha cheklangan. Toshkent aeroporti 2030 yilgacha o‘zining barcha resurslaridan foydalanib bo‘ladi», dedi Javlonbek Umarxo‘jayev.

Yangi aeroport birinchi bosqichda yiliga 20 mlngacha yo‘lovchiga xizmat ko‘rsatish, 169 ta samolyotni joylashtirish va bir vaqtning o‘zida soatiga kamida 40 dan ortiq uchish va qo‘nishni ta’minlash imkoniyatiga ega bo‘ladi. Terminal binosidan samolyotga to‘g‘ridan to‘g‘ri kirib ketish imkonini beradigan ko‘priklarning soni birinchi bosqichda 14 ta bo‘ladi, loyiha yakuni bilan ularning miqdori 45 taga yetkaziladi.