Andijon aeroporti xalqaro reyslarni qabul qilishni qayta tikladi

Keng ko‘lamli rekonstruksiyadan so‘ng, foydalanishga topshirilgan Andijon aeroporti 12 avgust kuni birinchi xalqaro reysni amalga oshirdi.

Birinchisi Flyone Asia mahalliy aviakompaniyasining Andijon - Jidda - Andijon yo‘nalishi bo‘yicha haftasiga ikki marta — seshanba va payshanba kunlari amalga oshiriladigan muntazam reysi bo‘ldi.

Bortida 151 yo‘lovchi bo‘lgan Q72261 reysi manziliga uchib ketdi. Aviakompaniya vakillari mazkur yo‘nalish ziyorat, sayyohlik va xizmat safarlari imkoniyatlarini kengaytirish, O‘zbekiston va Saudiya Arabistoni o‘rtasidagi aloqalarni mustahkamlashga xizmat qilishini alohida ta’kidladi.

Qayd qilinishicha, bugungi kunda Andijon aeroportidan muntazam qatnovlar Toshkentga, Silk Avia (dushanba va payshanba kunlari) va Uzbekistan Airways tomonidan (chorshanba va shanba kunlari) amalga oshirilmoqda.