To‘qayev taekvondo bo‘yicha qora kamar oldi va taxtani sindirdi

Qozog‘iston prezidenti sovg‘ani olganidan so‘ng, maxsus taxtani bir zarbada sindirishga muvaffaq bo‘ldi.

Foto: Videodan kadr

Butunjahon taekvondo federatsiyasi rahbari Chungvon Chou Qozog‘iston prezidenti Qosim-Jo‘mart To‘qayevga ushbu sport turining oliy mukofoti - to‘qqizinchi «dan» qora kamarini topshirdi, deb xabar berdi Oqo‘rda.

To‘qayev Butunjahon taekvondo federatsiyasi rahbarining iltimosiga binoan mashg‘ulot taxtasiga dastxat yozib qoldirdi, so‘ngra uni bir zarbada sindirdi.

«Men bunga munosib emasman, chunki taekvondo bilan shug‘ullanmayman. Sovg‘angizni biroz bo‘lsa-da oqlash uchun endi har kuni ertalab bir-ikki mashq qilishimga to‘g‘ri keladi», deb hazillashdi To‘qayev Oqo‘rdada Chou bilan bo‘lib o‘tgan uchrashuvda.