«Ko‘ngillilar koalitsiyasi» Ukrainaga tiyib turish kuchlarini kiritishga tayyorligini bildirdi

«Ko‘ngillilar koalitsiyasi» o‘t ochish to‘xtatilgandan so‘ng, xavfsizlik kafolatlari doirasida Ukrainaga tiyib turish kuchlarini darhol yuborishga tayyorligini rasman tasdiqlaydi. Bu haqda «Koalitsiya» yetakchilarining Ukraina prezidenti Volodimir Zelenskiy bilan uchrashuvi yakunlari bo‘yicha Buyuk Britaniya hukumati saytida e’lon qilingan bayonotda aytiladi.

«Uchrashuv ishtirokchilari Ukrainani doimo qo‘llab-quvvatlashini tasdiqladi va prezident Zelenskiyning Vashingtonda prezident Tramp bilan keyingi maslahatlashuvlari arafasida adolatli va mustahkam tinchlikka intilishini yuqori baholadi».

«Yetakchilar, shuningdek, prezident Trampning Ukrainaga xavfsizlik kafolatlarini taqdim etishga sodiqligini ta’kidladi, bunda «Ko‘ngillilar koalitsiyasi» muhim rol o‘ynaydi - jumladan, Ukrainadagi ko‘p millatli kuchlar va boshqa choralar orqali».

«Koalitsiya jangovar harakatlar to‘xtatilgandan so‘ng tiyib turish kuchlarini joylashtirishga, shuningdek, Ukraina osmoni va dengizlarini himoya qilish va uning qurolli kuchlarini tiklashga yordam berishga tayyorligini yana bir bor ta’kidladi», deyiladi bayonotda.

«Ko‘ngillilar koalitsiyasi» - bu asosan Yevropa davlatlarining ko‘ngilli birlashmasi bo‘lib, 2025 yil 2 martdagi London sammitidan so‘ng Buyuk Britaniya va Fransiya boshchiligida tashkil etilgan. Maqsad - Ukrainani qo‘llab-quvvatlashni kuchaytirish va xavfsizlik kafolatlari nuqtai nazaridan NATOga muqobilini taklif qilish.

Bu tuzilma Yevropa Ittifoqi yoki NATO kabi doimiy tashkilot emas, balki Ukrainani ixtiyoriy ravishda qo‘llab-quvvatlashga tayyor bo‘lgan davlatlar guruhidir. Mamlakatlar orasida: Fransiya, Buyuk Britaniya, Germaniya, NATO va Yevropa Ittifoqi a’zolari, shuningdek, Avstraliya, Kanada va boshqalar bor.