G‘azodagi ocharchilikka Isroilning jazosiz qolayotgani sabab bo‘lmoqda – Turkiya TIV

Turkiya tashqi ishlar vazirligi G‘azodagi ocharchilikka Isroilning shu paytgacha sodir etib kelayotgan harbiy jinoyatlari va xalqaro huquqni buzayotgani jazolanmay qolayotgani sabab bo‘lganini bildirdi.

Vazirlik bayonotida ta’kidlanishicha, BMT qo‘llovidagi IPC kuzatuv guruhi tomonidan G‘azodagi ocharchilik to‘g‘risidagi hisoboti «Netanyahu hukumatining genotsid siyosati va G‘azodagi falastinliklarga nisbatan munosabati keltirib chiqargan gumanitar falokat ko‘lami naqadar kengligini bildiradi».

«Shu paytgacha sodir etib kelayotgan harbiy jinoyatlari va xalqaro huquqni buzayotgani jazolanmay qolayotgani Isroilni ruhlantirmoqda va telbaga aylantirmoqda», - deyiladi bayonotda.

Avvalroq BMT qo‘llovidagi IPC kuzatuv guruhi G‘azoda 514 ming falastinlik ocharchilikdan aziyat chekayotgani, bu ko‘rsatkich sentabr oxiriga borib 641 ming kishiga yetishi kutilayotganini ma’lum qilgandi.