International Baccalaureate jamg‘armasi Rossiyada «nomaqbul» deb topildi

Rossiya Bosh prokuraturasi International Baccalaureate jamg‘armasini «nomaqbul» deb tan oldi. Bosh qarorgohi Shveytsariyada joylashgan tashkilot maktablar uchun ta’lim dasturlarini ishlab chiqadi.

Jamg‘arma maktab bitiruvchilariga 5000 ta oliy o‘quv yurtlaridan biriga o‘qishga kirishda yordam berishni taklif qiladi, deya xabar beradi Rossiya mahkamasi. Unga ko‘ra, ushbu ta’lim muassasalarida bilim olish jarayoni «tarixiy faktlarni buzib ko‘rsatish va millatlararo adovatni qo‘zg‘atish bilan birga kechmoqda». Rossiya Federatsiyasidan abituriyentlarga «taqiqlangan ekstremistik guruhlar mafkurasiga asoslangan noan’anaviy qadriyatlar singdirilmoqda», deyiladi Bosh prokuratura bayonotida. Idora ma’lumotlariga ko‘ra, jamg‘armaning asl maqsadi «rossiyalik yoshlarni G‘arb shablonlari bo‘yicha formatlash»dir.

International Baccalaureate jamg‘armasi 1968 yilda tashkil etilgan. U maktablarga 3 yoshdan 19 yoshgacha bo‘lgan bolalar uchun to‘rtta xalqaro ta’lim dasturlarini taklif qiladi. Rossiyada, tashkilot ma’lumotlariga ko‘ra, dasturlar Moskva, Sankt-Peterburg, Qozon va Vladivostokdagi bir qator ta’lim muassasalarida qo‘llanadi.

Rossiyada 2012 yildan beri «nomaqbul» tashkilotlar to‘g‘risidagi qonunchilik amal qiladi. Ro‘yxatga 250 dan ortiq tashkilot kiritilgan.