Yermak Uitkoff bilan uchrashuvda: Rossiya tinchlik tashabbuslarini sekinlashtirmoqda

Ukraina prezidenti devoni rahbari Andrey Yermak 29 avgust, juma kuni Nyu-Yorkda mamlakat tashqi ishlar vazirining birinchi o‘rinbosari Sergey Kislitsa bilan birgalikda AQSh prezidenti Donald Trampning maxsus vakili Stiven Uitkoff bilan uchrashdi. Muzokaralarning asosiy maqsadi, Yermakning so‘zlariga ko‘ra, «haqiqiy diplomatiyani rivojlantirish», Tramp va Ukraina prezidenti Volodimir Zelenskiy uchrashuvida erishilgan kelishuvlarni amalga oshirishni muvofiqlashtirish edi. 

«Uchrashuv avvalida men Stiv Uitkoffga Rossiyaning Ukrainadagi shahar va jamoatlarimizga qarshi har kuni sodir etayotgan harbiy jinoyatlari haqida ma’lumot berdim. Xususan, Kiyevga 23 kishi, jumladan, to‘rt nafar bolaning hayotiga zomin bo‘lgan yirik raketa va dron hujumi haqida gapirdim», — deb yozgan Yermak X ijtimoiy tarmog‘ida.

Ukraina prezidenti devoni rahbarining qayd etishicha, Rossiya urushni tugatish uchun zarur hech narsa qilmayapti va jangovar harakatlarni uzaytirmoqda. Shu bilan birga, Ukraina Donald Tramp va barcha hamkorlarning imkon qadar tezroq barqaror tinchlikka erishish borasidagi qat’iyatini qo‘llab-quvvatlaydi. «Ukraina Qo‘shma Shtatlar tomonidan taklif qilingan barcha tinchlik tashabbuslarini olqishlaydi. Lekin, afsuski, ularning har biri Rossiya tomonidan to‘xtatilmoqda», — deya qo‘shimcha qildi Andrey Yermak.