Shryoder «Shimoliy oqim-2» bo‘yicha ochiq guvohlik berishga tayyorlanmoqda

17 oktyabr kuni Germaniyaning sobiq kansleri «Shimoliy oqim-2» qurilishini tergov qilayotgan Meklenburg-Old Pomeraniya landtagi komissiyasiga video-aloqa orqali ochiq guvohlik beradi. Bu haqda Gerhard Shryoderning advokati xabar berdi.

Gerhard Shryoder Foto: Kay Nietfeld/dpa/picture alliance

Germaniyaning sobiq kansleri Gerhard Shryoder 17 oktyabr kuni «Shimoliy oqim-2» gaz quvuri qurilishi holatlarini o‘rganayotgan Meklenburg-Old Pomeraniya federal yeri landtagi (parlamenti) komissiyasiga ko‘rsatma berishi mumkin. Bu haqda 3 sentabr, chorshanba kuni Shryoderning advokatiga tayanib, dpa agentligi xabar berdi.

Shryoder Shverinda yig‘ilayotgan komissiyaga Hannoverdagi ofisidan video-aloqa orqali guvohlik berishi kutilmoqda. Sobiq kanslerning advokati zalda bo‘lgan matbuot va tashrif buyuruvchilar ko‘rsatmani videoga olmasligi shartini qo‘ydi. Advokat, shuningdek, protsedurani ertalabki soatlarga belgilashni so‘radi, chunki uning 81 yoshli mijozi «tushdan keyin ertalabki kabi konsentratsiya bilan guvohlik bera olmaydi».

«Janob Shryoderning ochiq so‘roq qilinishi yaxshi, ayniqsa u sotsial-demokratik «Shimoliy oqim 2/Iqlimni himoya qilish jamg‘armasi» bo‘yicha operatsiyani yoritishda juda muhim guvoh bo‘lganligi sababli», — dedi landtag komissiyasi rahbari Sebastyan Elers. U tergov tashabbuskorlaridan biri bo‘lgan Xristian-demokratik ittifoq vakili.