Olmaota aeroportida hazillashib «atom bombasi» borligini aytgan o‘zbekistonlik jazolandi

Qozog‘istonning Olmaota shahrida 18 yoshli O‘zbekiston fuqarosi aeroportda ro‘yxatdan o‘tish chog‘ida hazillashib, bagajida «atom bombasi» borligini aytganidan keyin mojaro keltirib chiqardi.

Hodisa 2 sentabr kuni sodir bo‘lgan va «jamoat tartibini buzib, yo‘lovchilar orasida xavotir uyg‘otgan». Oqibatda O‘zbekiston fuqarosiga chora ko‘rilgan va 78 640 tenge (1,8 mln so‘m) miqdorida jarimaga tortilgan.

Qozog‘iston IIV huzuridagi Transport politsiyasi departamenti ma’lumotlariga ko‘ra, yil boshidan buyon poyezdlar va samolyotlardan turli qoidabuzarliklar uchun 900 kishi tushirib yuborilgan: 489 kishi poyezddan, 411 kishi samolyotdan. Hodisalar ko‘pincha spirtli ichimliklar ichish, mast holatda bo‘lish, vagonlarda chekish yoki mayda bezorilik bilan bog‘liq.

Avvalroq, Toshkent metrosida 19 yoshli qiz hazillashib, sumkasida bomba borligini aytganidan keyin 5 sutkaga qamalgan edi.