2,3 soniyada 100 km tezlikka chiqadi: Ferrari 1050 ot kuchiga ega Testarossa’ni taqdim etdi

Ferrari’ning bu superkari hibrid bo‘lib, uning kapoti ostida 4 litrl sig‘imli biturbo V8 dvigateli o‘rnatilgan. U 819 ot kuchini beradi. Qo‘shimcha ravishda 3 ta elektromotor ham bor. Dvigatel va elektromotorlar birgalikda 1050 ot kuchini beradi. Bu Ferrari’ning seriyali ishlab chiqarilgan modellari orasida rekord hisoblanadi.

Ferrari  849 Testarossa Spider 100 km tezlikka atigi 2,3 soniyada chiqadi, 200 km tezlikka esa 6,3 soniya kifoya. Maksimal tezligi esa soatiga 330 kmdan ham baland. 

Superkar salonida ham qator o‘zgarishlar bor: sensorli panellar o‘rniga Ferrari Amalfi’dagi kabi tugmachalar paydo bo‘ldi. Markaziy tunnelning ergonomikasi yaxshilanib, buyumlarni saqlash uchun joy paydo bo‘ldi. Xaridorlar o‘rindiqlar borasida tanlov qilishlari mumkin: masalan, karbonli sport o‘rindiqlari yoki juda talabchan mijozlar uchun 30 kg yengillashtirilgan Assetto Fiorano to‘plami ham bor.

Xavfsizlik tizimlari ro‘yxatiga Stop&Go funksiyali moslashuvchan kruiz-nazorat, velosipedchilarni aniqlash xususiyatiga ega shoshilinch tormozlash tizimi, ko‘rinmas zonalarni kuzatish, harakatlanish yo‘lagidan chiqish haqida ogohlantirish, yo‘lakda saqlab qolish, 360 darajali kamera, haydovchi charchoq holatini nazorat qilish va boshqa tizimlar kiritilgan.

Modelning kupe varianti uchun 460 ming, Spider uchun esa 500 ming yevro narx belgilangan.

Testarossa nomi avtoolamda dastlab 1956 yilda paydo bo‘lgan. 1984 yilda esa u 395 ot kuchiga ega 4,9 litrli dvigatel bilan taqdim etilgan. Soatiga 290 km tezlikda harakatlana olgan Testarossa o‘z davrining ramziga aylangandi.