Toshkentda O‘zbekiston-Ummon siyosiy maslahatlashuvlari bo‘lib o‘tdi

TIV ma’lumotiga ko‘ra, delegatsiyalarga O‘zbekiston tashqi ishlar vazirining birinchi o‘rinbosari Bahrom A’loyev hamda Ummon tashqi ishlar vazirining siyosiy masalalar bo‘yicha o‘rinbosari Shayx Xalifa bin Ali al-Xarisiy rahbarlik qildi.

Muzokaralarda O‘zbekiston–Ummon munosabatlarining joriy holati va rivojlanish istiqbollari atroflicha muhokama qilindi. Tomonlar siyosiy muloqotni chuqurlashtirish, parlamentlararo aloqalarni mustahkamlash, hamkorlikning shartnoma-huquqiy bazasini kengaytirish va xalqaro tashkilotlar doirasida o‘zaro hamkorlikni yanada rivojlantirishga tayyor ekanini tasdiqladi.

Asosiy e’tibor iqtisodiy diplomatiyani faollashtirish masalalariga qaratildi. Ikki tomon tashqi savdo hajmini oshirish va uni diversifikatsiya qilish, shuningdek, qo‘shma investitsiya loyihalarini amalga oshirish yuzasidan choralar ishlab chiqishga kelishib oldi.

Shuningdek, madaniy-gumanitar aloqalarni kengaytirish, ta’lim, ilmiy-tadqiqot va turizm sohalarida sheriklikni rivojlantirish masalalari muhokama qilindi. Tomonlar xalqaro va mintaqaviy kun tartibining ayrim masalalari yuzasidan ham fikr almashdi.

Maslahatlashuvlar yakunida O‘zbekiston Tashqi ishlar vazirligi va Ummon Tashqi ishlar vazirligi o‘rtasida ikki tomonlama hamkorlikni mustahkamlashga qaratilgan qo‘shma harakatlar rejasi imzolandi.