Buxoroda hokim yordamchisi pora bilan ushlandi

U hokimiyat zaxirasidagi yer maydonini onlayn auksion savdolari orqali sotib olib berish evaziga fuqarodan 6 ming dollar talab qilgan. Kelishilgan pulni olganda esa tezkor tadbirda ushlangan.

Buxoro viloyati Peshku tumanida hokim yordamchisi tezkor tadbirda pora bilan qo‘lga olindi. Bu haqda Davlat xavfsizlik xizmati xabar berdi.

Ma’lum qilinishicha, hokim yordamchisi hokimiyat zaxirasidagi 7 sotix yer maydonini “K-savdo” avtomatlashtirilgan axborot tizimiga joylashtirib, so‘ngra onlayn auksion savdolari orqali sotib olib berish evaziga tadbirkordan 6 ming dollar talab qilgan.

Tadbirkorning arizasi asosida Davlat xavfsizlik xizmati, Bosh prokuratura huzuridagi departament va Ichki ishlar organlari xodimlari hamkorligida tezkor tadbir o‘tkazilgan. Unda hokim yordamchisi tamagirlik yo‘li bilan 6 ming dollar miqdoridagi porani uchinchi shaxs orqali olgan vaqtida ashyoviy dalillar bilan ushlangan.

Hokim yordamchisiga nisbatan Jinoyat kodeksining 210-moddasi (pora olish) 2-qismi “v” bandi bilan jinoyat ishi qo‘zg‘atilgan hamda qamoq ehtiyot chorasi qo‘llangan. Hozirda tergov harakatlari olib borilmoqda.

Oldinroq Surxondaryo viloyati prokuraturasining bo‘lim prokurori tezkor tadbirda ushlangandi.

Tayyorlagan: Руслан Сабуров

#pora #Buxoro viloyati #hokim yordamchisi