34 fuqaro hayvonlarga nisbatan shafqatsiz munosabat uchun javobgarlikka tortildi

2020-2024 yillar davomida Ma’muriy javobgarlik to‘g‘risidagi kodeksning 111-moddasi (hayvonlarga nisbatan shafqatsiz munosabatda bo‘lish) bilan 397 nafar shaxs ma’muriy javobgarlikka tortilib, 363 nafariga jarima va 34 nafariga ma’muriy qamoq jazolari qo‘llangan.

Joriy yilning birinchi yarmida ushbu moddada nazarda tutilgan huquqbuzarlikni sodir etgan 34 nafar shaxs ma’muriy javobgarlikka tortilib, 32 nafariga jarima va 2 nafariga ma’muriy qamoq jazolari qo‘llandi.

Hayvonlarga nisbatan shafqatsiz munosabatda bo‘lish, ya’ni ularni g‘arazli yoki boshqa past niyatlarda qiynoqqa solish yoki ularga azob berish — BHMning 3-5 baravarigacha miqdorda jarima solishga sabab bo‘ladi.

Xuddi shunday huquqbuzarlik ma’muriy jazo chorasi qo‘llanganidan keyin bir yil davomida takror sodir etilgan bo‘lsa yoxud ushbu moddaning birinchi qismida nazarda tutilgan huquqbuzarlik voyaga yetmagan shaxs hozirligida sodir etilgan bo‘lsa yoki hayvonlarning o‘limiga yoxud mayib bo‘lishiga olib kelsa —BHMning 5-10 baravarigacha miqdorda jarima solishga yoki 15 sutkagacha ma’muriy qamoqqa olishga sabab bo‘ladi.