Ukraina PURL dasturi doirasida Patriot va HIMARS raketalarini oladi

AQSh va uning ittifoqchilari tomonidan ishlab chiqilgan yangi PURL dasturi doirasida Ukrainaga harbiy yordamning dastlabki ikki paketi Patriot havo mudofaa tizimi va HIMARS yalpi o‘t ochish tizimi uchun raketalarni o‘z ichiga oladi. Bu haqda Ukraina prezidenti Volodimir Zelenskiy 17 sentabr, chorshanba kuni Kiyevda Yevroparlament rahbari Roberta Metsola bilan qo‘shma matbuot anjumanida ma’lum qildi.

"Biz PURL dasturi bo‘yicha hamkorlarimizdan 2 milliard dollardan ortiq mablag‘ oldik. Oktyabr oyida biz yana olamiz... O‘ylaymanki, biz oxir-oqibat taxminan 3-3,5 milliard dollarga ega bo‘lamiz", — dedi Zelenskiy. Uning ta’kidlashicha, Amerikada ishlab chiqarilgan qurol va o‘q-dorilarning dastlabki ikki paketining har biri 500 million dollarni tashkil qiladi.

Bu Kiyevga harbiy yordam berishning yangi mexanizmidan birinchi marta foydalanish. Ushbu tashabbusga ko‘ra, ittifoqchilar Ukraina uchun Amerika qurollariga uning Prioritised Ukraine Requiremens List (PURL) ro‘yxatidan to‘laydi.

16 sentabr kuni Reuters agentligi Tramp ma’muriyati Ukrainaga harbiy yordam ko‘rsatishning dastlabki ikkita paketini ma’qullagani va ular tez orada yuborilishi mumkinligini ma’lum qildi.