Rossiyalik propagandachi Tigran Keosayan vafot etdi

Rejissyor, prodyuser va teleboshlovchi Tigran Keosayan 59 yoshda hayotdan ko‘z yumdi. Uning o‘limi haqida rafiqasi, propagandachi Margarita Simonyan xabar berdi.

Keosayan 2024 yil dekabrida shifoxonaga yotqizilgan, 2025 yil yanvarida klinik o‘lim holatini boshdan kechirgan va shundan buyon hushsiz yotgandi. Rafiqasi azaldan uning yuragi xasta bo‘lganini aytgan.

Russia Today bosh muharriri bo‘lgan Margarita Simonyanning o‘zi ham og‘ir xastalikka chalingan. 2025 yil sentabrida u saratondan da’volanayotganini, yaqinda murakkab operatsiyadan o‘tgani, kimyoterapiya tufayli endi parik taqib yurishini xabar qilgandi.

Keosayan «Bechora Sasha» (1997), «Prezident va uning nabirasi» (1999), «Marvaridgul» (2000), «Qrim ko‘prigi. Muhabbat bilan qilingan» (2018) kabi filmlar rejissyori sifatida tanilgan.

U ReN TV, «Rossiya» va NTV kabi davlat kanallarida teleboshlovchi bo‘lib ishlagan. Uning so‘nggi loyihasi propaganda ruhidagi «Xalqaro pilorama» nomli satirik shou bo‘lgandi.

2022 yilda Keosayan «Rossiya nashrlarida Ukrainaga qarshi propagandani targ‘ib qilgani» uchun Yevroittifoqning sanksiyalar ro‘yxatiga kiritilgandi.