Jizzaxda sudya yordamchisi 300 dollar olgan vaqtida ushlandi

Fuqarolik ishlari bo‘yicha Do‘stlik tumanlararo sudi sudya yordamchisi 300 dollar olganlikda gumonlanmoqda. U fuqaroga turmush o‘rtog‘i bilan ajrimini tezlashtirib, mol-mulkning bir qismini olishida yordam bermoqchi bo‘lgan.

Foto: DXX

Jizzax viloyati fuqarolik ishlari bo‘yicha Do‘stlik tumanlararo sudi sudya yordamchisi pora olgan vaqtida ushlandi, deya xabar bermoqda Davlat xavfsizlik xizmati.

U Mirzacho‘l tumanida yashovchi ayolning turmush o‘rtog‘i bilan o‘zaro ajrimini tezlashtirib, er-xotin o‘rtasidagi mol-mulkning bir qismini olishida yordam bermoqchi bo‘lgan. Buning evaziga 300 dollar talab qilgan.

Tezkor tadbirda sudya yordamchisi o‘zining xizmat xonasida so‘ralgan pul mablag‘ini olgan vaqtida ashyoviy dalillar bilan ushlangan.

Hozirda unga nisbatan Jinoyat kodeksining 168-moddasi 3-qismi «v» bandi (Xizmat mavqeidan foydalangan holda firibgarlik) va 211-moddasi 1-qismi (Pora berish) bilan jinoyat ishi qo‘zg‘atilib, qamoq ehtiyot chorasi qo‘llangan.

Tergov harakatlari olib borilmoqda.