Samarqandda granit zavodi ishga tushdi

Samarqandning Qo‘shrabot tumanida granit toshlarni qayta ishlashga qaratilgan 127,4 milliard so‘mlik loyiha foydalanishga topshirildi.

Investitsiyalar vazirligi xabariga ko‘ra, investor – “Ba Da Stone” xorijiy korxonasi bo‘lib, u loyihani to‘liq o‘z mablag‘lari hisobidan moliyalashtirgan.

Zavod yiliga 2,2 million kvadrat metr granit mahsulotlari ishlab chiqaradi. Yangi ochilgan ish o‘rinlari soni – 500 ta.

“Ba Da Stone” MChJ 2024 yil 12 iyulda Qo‘shrabot tumanida tashkil etilgan. Ta’sischilari – Wang Chunlin (66,67 foiz, u korxona rahbari ham hisoblanadi) va Huang Xiongzong (33,33 foiz).

Kompaniya tumanning “Chimmas” MFY hududidan 10 gektar yer maydonini auksion orqali ijaraga olgan va loyiha shu yerda amalga oshirilgan.

“Mazkur loyiha Qo‘shrabot tumanida yirik sanoat quvvatlarini rivojlantirish, aholiga ish o‘rinlari yaratish va mahalliy iqtisodiyotning raqobatbardoshligini oshirishga xizmat qiladi”, – deyiladi vazirlik xabarida.