Isroil harbiy-dengiz kuçlari kemalari Ğazo sektoriga kirişga urinayotgan Falastin tarafdorlari bölgan «yordam flotiliyasi»ning bir neçta kemalarini töxtatdi. Isroil taşqi işlar vazirligining 1 oktyabr, çorşanba kuni keçqurun bergan ma’lumotlariga köra, «bir neçta kemalar» zarar yetkazmasdan töxtatilgan.
Xabar qilinişiça, yölovçilar Isroil portlariga olib ketilgan. «Greta va uning döstlari xavfsiz va soğlom», — deyiladi Isroil rasmiylari bayonotida. Bu falastinliklarni qöllab-quvvatlab, bir neça bor çiqiş qilgan şved ekologiya faoli Greta Tunbergga işora qiladi.
Joriy yilning iyun va iyul oylarida Isroil Ğazo sektoriga dengiz orqali yordam yetkaziş böyiça şu kabi taşabbuslarni töxtatgan: harbiylar gumanitar yordam olib ketayotgan kemalarni töxtatib, ekipajlarni qölga olgan va ularni çiqarib yuborgan. Iyun oyida Greta Tunberg Isroil harbiylari Ğazo sektori qirğoqlaridan taxminan 185 kilometr uzoqlikda töxtagan flotiliyada iştirok etdi.
Hozirgi flotiliya avgust oyi oxirida Barselonadan jönab ketdi. Dpa axborot agentligi ma’lumotlariga köra, u 40 dan ortiq qayiq va yelkanli qayiqlardan iborat bölib, ularda jami bir neça yuz kişi, jumladan Greta Tunberg bölgan.
AFP xabariga köra, flotiliya taşkilotçilari Isroilning Aşdod porti orqali Ğazo sektoriga gumanitar yordam yetkaziş taklifini rad etgan. Bundan taşqari, 1 oktyabr kuni faollar Isroil anklav qirğoqlaridan 280 kilometr uzoqlikda örnatgan Ğazo sektorining dengiz blokadasiga yetib bormasdan turib, Italiyaning namoyişni töxtatiş va tugatiş haqidagi çaqiriğini rad etdi.
Isroil flotiliyani töxtatgandan söng, Rim va Neapolda Falastinni qöllab-quvvatlovçi namoyişlar bölib ötdi. Namoyişçilar Italiya boş vaziri Jorja Melonini flotiliya faollari bilan birdamlik yöqligida aybladi, deya xabar beradi dpa.
