Britaniya O‘zbekiston hududlari uchun ustuvor loyihalarni ishlab chiqishda ko‘maklashadi

Britaniyaning yetakchi muhandislik kompaniyasi O‘zbekiston hududlari uchun ustuvor bo‘lgan loyihalarni ishlab chiqishda ko‘maklashadi.

Foto: Dunyo

Mamlakat elchixonasi tomonidan O‘zbekiston Iqtisodiyot va moliya vazirligi hamda Britaniyaning ARUP kompaniyasi rahbariyati o‘rtasida onlayn muzokaralar tashkil etildi.

ARUP vakillari kompaniya O‘zbekistonda bir qator loyihalarni muvaffaqiyatli amalga oshirganligini qayd etish barobarida, loyihalar yo‘nalishlarini kengaytirishga tayyor ekanini ta’kidladi.

Tomonlar viloyat, shahar va tumanlar darajasidagi ustuvor loyihalarni ishlab chiqish va amalga oshirish yuzasidan fikr almashdi.

ARUP muhandislik, loyihalashtirish va ularni boshqarish sohalariga ixtisoslashgan. Shuningdek, kompaniya konsalting, shu jumladan qurilish, transport, energetika va suv resurslari muhandisligi yo‘nalishlarida faoliyat yuritadi. O‘zbekistonda qator loyihalarni amalga oshirmoqda.