Yasmin choyi qondagi shakar miqdorini kamaytirishi aniqlandi 

Xitoylik va janubiy afrikalik olimlar yasmin (jasmin) choyi glyukoza almashinuvini yaxshilashi va qondagi yog‘lar miqdorini kamaytirishini aniqlashdi.  

Ikkinchi tipdagi diabet bilan kasallangan kalamushlarda o‘tkazilgan tajribalarda yasmin choyi qondagi shakar miqdorini kamaytirgan, insulin ishlab chiqarilishini kuchaytirgan va β-hujayralarini qayta tiklagan.  

Mualliflarning qayd etishicha, yasmin choyida uning tarkibidagi biologik faol moddalar o‘zlashtirilishini kuchaytiruvchi nanozarralar hamda antioksidant ta’sirini kuchaytiruvchi kamyob mikroelementlar mavjud. Ular birgalikda organizmning moddalar almashinuvi bilan bog‘liq salbiy jarayonlarga qarshi samarali kurashishiga yordam beradi.  

Tajribalar hozircha faqat hayvonlarda o‘tkazilgan bo‘lsa-da, tadqiqotchilar yasmin choyi insonlardagi qandli diabet kasalligini davolashda qo‘shimcha vosita bo‘ladi deb hisoblashmoqda.